India
oi-Lingareddy Gajjala
పార్లమెంట్ వేదికగా భారత ప్రజాస్వామ్య చరిత్రలో ఎన్నడూ లేని విధంగా ఒక అనూహ్యమైన, అత్యంత నాటకీయ పరిణామం చోటుచేసుకుంది. భారత ప్రధాన ఎన్నికల కమిషనర్ (సీఈసీ) జ్ఞానేష్ కుమార్ను పదవి నుంచి తొలగించాలంటూ విపక్ష కూటమి పార్లమెంట్లో యుద్ధభేరి మోగించింది. ఐదు రాష్ట్రాల అసెంబ్లీ ఎన్నికల నగారా మోగనున్న తరుణంలో, సాక్షాత్తూ ఎన్నికల బాస్పైనే ఎంపీలు ‘అభిశంసన’ అస్త్రాన్ని ప్రయోగించడం ఇప్పుడు దేశవ్యాప్తంగా పెను సంచలనంగా మారింది.
సాధారణంగా ఇలాంటి నోటీసులకు అవసరమైన బలం కంటే రెట్టింపు స్థాయిలో ఎంపీలు సంతకాలు చేయడం గమనార్హం. లోక్సభలో 100 మంది సంతకాలు సరిపోతుండగా, ఏకంగా 130 మందికి పైగా ఎంపీలు నోటీసుపై సంతకాలు చేశారు. అటు రాజ్యసభలోనూ అవసరమైన 50 కంటే ఎక్కువగా, 63 మంది సభ్యులు దీనికి మద్దతు పలికారు. ‘ఇండియా’ కూటమిలోని అన్ని పార్టీలతో పాటు ప్రస్తుతం స్వతంత్రంగా వ్యవహరిస్తున్న ఆమ్ ఆద్మీ పార్టీ కూడా ఈ పోరులో చేతులు కలిపింది. శుక్రవారం పార్లమెంట్లోని ఏదో ఒక సభలో ఈ నోటీసును అధికారికంగా సమర్పించనున్నారు.
7 కీలక ఆరోపణలు.. నిష్పక్షపాతమే లక్ష్యంగా!
సీఈసీపై విపక్షాలు కేవలం ఆరోపణలు చేయడమే కాకుండా, ఏడు ప్రధానాంశాలతో కూడిన చార్జిషీట్ను సిద్ధం చేశాయి. ముఖ్యంగా అధికార బీజేపీకి అనుకూలంగా వ్యవహరిస్తున్నారని, ఎన్నికల మోసంపై విచారణను అడ్డుకుంటున్నారని, ఓటర్ల జాబితా నుంచి భారీగా పేర్ల తొలగింపు (సామూహిక ఓటు హక్కు రద్దు) వంటి తీవ్రమైన విమర్శలు గుప్పించారు. పశ్చిమ బెంగాల్ వంటి రాష్ట్రాల్లో ఓటర్ల జాబితా సవరణ ప్రక్రియ కేంద్రానికి లబ్ధి చేకూర్చేలా ఉందంటూ మమతా బెనర్జీ వంటి నేతలు చేసిన ఫిర్యాదులు ఈ నోటీసు వెనుక ప్రధాన కారణంగా కనిపిస్తున్నాయి.
న్యాయమూర్తి తరహాలోనే CEC విచారణ.. అగ్నిపరీక్ష!
ప్రధాన ఎన్నికల కమిషనర్ను తొలగించడం అంత సామాన్యమైన విషయం కాదు. రాజ్యాంగంలోని ఆర్టికల్ 324(5) ప్రకారం, సుప్రీంకోర్టు న్యాయమూర్తిని ఎలాగైతే అభిశంసిస్తారో, అదే కఠినమైన ప్రక్రియ ఇక్కడ కూడా అమలు చేయాలి. ఒకవేళ ఈ నోటీసును సభ ఆమోదిస్తే, సుప్రీంకోర్టు న్యాయమూర్తి లేదా సీజేఐ నేతృత్వంలో ఒక హైలెవల్ కమిటీని ఏర్పాటు చేస్తారు. ఒక కోర్టు విచారణ లాగే సాక్షులను విచారించడం, నిందితుడిని క్రాస్ ఎగ్జామిన్ చేయడం వంటివి జరుగుతాయి. ఈ ప్రక్రియ మొత్తంలో జ్ఞానేష్ కుమార్ కూడా సభ ముఖద్వారం వద్ద నిలబడి తన వాదనను వినిపించుకునే అవకాశం ఉంటుంది.
ఉత్కంఠ రేపుతున్న పార్లమెంట్ సమావేశాలు!
స్పీకర్ ఓం బిర్లాపై విపక్షాలు ఇచ్చిన నోటీసు కొద్దిరోజుల క్రితమే వీగిపోయిన నేపథ్యంలో, ఇప్పుడు నేరుగా ఎన్నికల కమిషనర్ను టార్గెట్ చేయడం రాజకీయంగా పెను దుమారానికి దారితీసింది. పార్లమెంట్లో ఈ తీర్మానం నెగ్గాలంటే హాజరైన వారిలో మూడింట రెండు వంతుల మెజారిటీ అవసరం. మరి అధికార పక్షం దీనిని ఎలా అడ్డుకుంటుంది? విపక్షాలు ఈ పోరాటాన్ని చివరి వరకు తీసుకెళ్లగలవా? అనేది ఇప్పుడు దేశం ముందున్న అతిపెద్ద ప్రశ్న.
