International
-Korivi Jayakumar
పాకిస్తాన్, ఆఫ్ఘనిస్తాన్ మధ్య వివాదం తీవ్రరూపం దాల్చింది. ఫిబ్రవరి 27, 2026 నాడు తెల్లవారుజామున పాకిస్తాన్ ఆఫ్ఘాన్ రాజధాని కాబూల్తో పాటు పలు నగరాలపై వైమానిక దాడులు చేసింది. ఈ దాడులకు ప్రతిగా తాలిబాన్లు వెంటనే ప్రతీకార దాడులకు దిగడంతో ఇరు దేశాల సరిహద్దుల్లో ఘర్షణలు తీవ్రమయ్యాయి. పాకిస్తాన్లోని అనేక ప్రాంతాల్లో దాడులు జరగినట్లు వార్తలు వస్తున్నాయి.
ఈ పరిణామాల మధ్య, తాలిబాన్లు ఆత్మాహుతి దాడులు చేసేందుకు ప్రత్యేకంగా “సూసైడ్ స్క్వాడ్ల”ను సిద్ధం చేస్తున్నట్లు సమాచారం. స్థానిక మీడియా ఈ బెటాలియన్లకు సంబంధించిన ఫోటోలను ప్రచురించింది. బాంబర్లు పేలుడు దుస్తులు, కార్ బాంబులతో సహా పూర్తి సన్నద్ధంగా ఉన్నట్లు నివేదికలు స్పష్టం చేస్తున్నాయి.
కాగా తాలిబాన్ డిప్యూటీ ప్రతినిధి హమ్దుల్లా ఫిత్రాత్ మాట్లాడుతూ.. పాక్టియా, పాక్టికా, ఖోస్ట్ ప్రావిన్సులలోని డ్యూరాండ్ లైన్ (పాకిస్తాన్ సరిహద్దు) వెంబడి, అలాగే ఇతర అనేక ప్రాంతాలలో తీవ్రమైన దాడి, ప్రతీకార చర్యలు కొనసాగుతున్నాయని ధృవీకరించారు. ఇరు దేశాల మధ్య జరుగుతున్న ఘర్షణల్లో వందలాది మంది మరణించినట్లు ప్రకటించుకున్నాయి.
పాకిస్తాన్ గణాంకాల ప్రకారం.. 133 మంది ఆఫ్ఘన్ తాలిబాన్ యోధులు మరణించగా, 200 మందికి పైగా గాయపడ్డారు. 27 సైనిక పోస్టులు ధ్వంసమై, తొమ్మిది మంది పట్టుబడ్డారని పాకిస్తాన్ తెలిపింది. తాలిబాన్ వెల్లడించిన వివరాల ప్రకారం.. 55 మంది పాకిస్తాన్ సైనికులు మరణించారు, 19 పోస్టులు స్వాధీనం చేసుకున్నారు. నంగర్హార్లో ఎనిమిది మంది ఆఫ్ఘన్ యోధులు ప్రాణాలు కోల్పోయినట్లు తాలిబాన్ పేర్కొంది.
ఇదిలా ఉండగా పాకిస్తాన్ ఇప్పటికే ఆఫ్ఘనిస్తాన్పై “బహిరంగ యుద్ధ ప్రకటన” చేసింది. పాకిస్తాన్లో దాడులకు పాల్పడుతున్న ఉగ్రవాదులకు ఆఫ్ఘనిస్తాన్ ఆశ్రయం కల్పిస్తోందని ఆ దేశం తీవ్రంగా ఆరోపిస్తోంది. ఈ ఘర్షణలకు ‘డ్యూరాండ్ లైన్’ సరిహద్దు వివాదం కూడా ఒక ముఖ్య కారణమని భావిస్తున్నారు.
