Business
-Lingareddy Gajjala
ఉద్యోగం మారితే జీతం ఎంత పెరుగుతుంది? 2026లో వేతనాలు ఎటు వెళ్తాయి? ఈ ప్రశ్నలు ఇప్పుడు ప్రతి ఉద్యోగి మనసులో తిరుగుతున్నాయి. దీనికి స్పష్టమైన సమాధానాన్ని ఇచ్చేలా రిక్రూట్మెంట్ దిగ్గజం మైఖేల్ పేజ్ ఇండియా విడుదల చేసిన ‘ది సాలరీ గైడ్ 2026’ కీలక విషయాలను వెలుగులోకి తీసుకొచ్చింది. ఈ నివేదిక ప్రకారం, వచ్చే ఏడాది భారత ఉద్యోగ మార్కెట్లో వేతన పెంపులు స్థిరంగా కొనసాగనున్నప్పటికీ, ప్రత్యేక నైపుణ్యాలు కలిగిన వారికి మాత్రం భారీ అవకాశాలు ఎదురవుతున్నాయి.
నివేదిక అంచనా ప్రకారం, 2026 నాటికి వివిధ పరిశ్రమలలో సాధారణ వార్షిక వేతన పెంపులు 8 నుంచి 12 శాతం మధ్య ఉండనున్నాయి. గత కొన్ని సంవత్సరాలుగా చూసిన వేగవంతమైన వేతన వృద్ధితో పోలిస్తే, ఇప్పుడు మార్కెట్ సమతుల్యత దిశగా కదులుతోందని గైడ్ పేర్కొంది. ఇది ఉద్యోగ రంగంలో స్థిరత్వం, దీర్ఘకాలిక పురోగతికి సంకేతమని విశ్లేషించింది. అయితే, ఈ సాధారణ గణాంకాలకు మించిన లాభాలు కూడా ఉన్నాయి. ప్రత్యేక సాంకేతిక నైపుణ్యాలు, బలమైన నాయకత్వ లక్షణాలు కలిగిన నిపుణులు ఉద్యోగం మారితే 30 శాతం వరకు వేతన పెరుగుదలను పొందే అవకాశం ఉందని మైఖేల్ పేజ్ స్పష్టం చేసింది. 2026లో ఉద్యోగ మార్పులు కేవలం సంఖ్యల ఆటగా కాకుండా, సామర్థ్యాల ఆధారిత నిర్ణయాలుగా మారనున్నాయని నివేదిక అంచనా వేస్తోంది.
భారత ఆర్థిక వ్యవస్థలో కీలక పాత్రలు పోషిస్తున్న చీఫ్ ఫైనాన్షియల్ ఆఫీసర్లు (CFOలు), చీఫ్ టెక్నాలజీ ఆఫీసర్లు (CTOలు), హెడ్స్ ఆఫ్ ఇంజినీరింగ్, సీనియర్ ట్రాన్స్ఫర్మేషన్ లీడర్స్ వంటి నాయకత్వ స్థానాలు వచ్చే ఏడాదిలోనూ అత్యధిక వేతనం పొందే ఉద్యోగాల జాబితాలో కొనసాగనున్నాయి. కొన్నేళ్లుగా కొనసాగిన అధిక వృద్ధి తరువాత, సంస్థలు ఇప్పుడు మరింత జాగ్రత్తగా నియామకాలు చేస్తున్నాయని గైడ్ పేర్కొంది. తాత్కాలిక అవసరాలకన్నా, దీర్ఘకాలిక విలువను సృష్టించే ప్రతిభపైనే కంపెనీలు దృష్టి సారిస్తున్నట్లు నివేదిక స్పష్టం చేసింది. ఈ మార్పు ఉద్యోగ మార్కెట్ను మరింత పరిపక్వ దశకు తీసుకెళ్తుందని విశ్లేషకులు అభిప్రాయపడుతున్నారు.
ఈ ధోరణులపై మైఖేల్ పేజ్ ఇండియా, సింగపూర్ సీనియర్ మేనేజింగ్ డైరెక్టర్ నిలయ్ ఖండేల్వాల్ స్పందిస్తూ, 2026 భారత ఉద్యోగ మార్కెట్ సామర్థ్యం, ఉద్దేశ్యంపై ఆధారపడిన వృద్ధిని ప్రతిబింబిస్తుందని తెలిపారు. ప్రత్యేక నైపుణ్యాలు, నాయకత్వ లోతు కలిగినవారే సంస్థల దీర్ఘకాలిక వ్యూహాల్లో కీలకంగా మారతారని ఆయన చెప్పారు. ప్రపంచవ్యాప్తంగా కొనసాగుతున్న అనిశ్చితుల మధ్య కూడా, భారతదేశంలోని బలమైన దేశీయ వినియోగం, స్థానిక సంస్థల విస్తరణ నియామకాలకు బలమైన మద్దతుగా నిలుస్తున్నాయని గైడ్ పేర్కొంది. ముఖ్యంగా సాఫ్ట్వేర్, డేటా, డిజిటల్ డిజైన్ రంగాల్లో ప్రాజెక్ట్ ఆధారిత, కాంట్రాక్ట్ ఉద్యోగాల డిమాండ్ వేగంగా పెరుగుతోందని నివేదిక వెల్లడించింది.
పోటీ ఉద్యోగ మార్కెట్లో ముందుండాలంటే సంస్థలు ప్రణాళికాబద్ధమైన శ్రామికశక్తి అభివృద్ధి, ప్రతిభను నిలుపుకునే విధానాలపై పెట్టుబడులు పెట్టాల్సిన అవసరం ఉందని గైడ్ సూచించింది. అదే సమయంలో, ఉద్యోగులు కూడా మారుతున్న అవసరాలకు అనుగుణంగా నైపుణ్యాలను పెంపొందించుకుంటేనే రాబోయే వృద్ధిలో భాగస్వాములు కావచ్చని స్పష్టం చేసింది. ‘సాలరీ గైడ్ 2026’లో గ్లోబల్ క్యాపబిలిటీ సెంటర్స్ (GCCలు) ప్రాధాన్యతను ప్రత్యేకంగా ప్రస్తావించారు. అధిక విలువ కలిగిన ప్రపంచ స్థాయి పాత్రలు, సంక్లిష్ట సామర్థ్యాల నిర్మాణానికి భారతదేశం ప్రధాన గమ్యస్థానంగా ఎదుగుతున్నట్లు నివేదిక పేర్కొంది.
ఈ విషయంపై ఖండేల్వాల్ మాట్లాడుతూ, భారతదేశం ఇకపై కేవలం తక్కువ ఖర్చుతో కూడిన ప్రతిభ గల దేశంగా కాకుండా, ఆవిష్కరణలు, విశ్లేషణలు, వ్యూహాత్మక ప్రపంచ పాత్రలకు కేంద్రంగా మారుతోందని అన్నారు. ఈ మార్పే 2026లో ఉద్యోగ మార్కెట్కు దిశానిర్దేశం చేస్తుందని ఆయన అభిప్రాయపడ్డారు.
