India
oi-Syed Ahmed
ఇరాన్ (IRAN) వార్ ప్రభావం ఇప్పుడు దేశంలోని అన్ని రంగాలపై కనిపిస్తోంది. ఇందుకు విమానయాన రంగం కూడా మినహాయింపు కాదు. పశ్చిమాసియా యుద్ద పరిస్ధితుల కారణంగా పెరుగుతున్న ఇంధన ధరలతో విమాన ప్రయాణ టికెట్ల ధరల్ని కూడా ఎయిర్ లైన్ సంస్థలు పెంచేస్తున్నాయి. ఇందులో ఎయిర్ ఇండియా ముందుంది. ఇప్పటికే తమ విమాన టికెట్లపై ఇంధన సర్ ఛార్జ్ పేరుతో ఎయిరిండియా రేట్లు పెంచేయగా.. ఇప్పుడు ఇండిగో (indigo) కూడా అదే బాట పట్టింది.
పశ్చిమాసియాలో కొనసాగుతున్న సంఘర్షణ కారణంగా ఇంధన ధరలు గణనీయంగా పెరిగాయని పేర్కొంటూ.. మార్చి 14 శనివారం నుండి దేశీయ, అంతర్జాతీయ విమానాలపై ఇంధన సర్ఛార్జ్ను అమలు చేయనున్నట్లు ఇండిగో ప్రకటించింది.
అంతర్జాతీయ వాయు రవాణా సంఘం జెట్ ఇంధన మానిటర్ వివాదం కారణంగా ఈ ప్రాంతానికి ఇంధన ధరలు 85% కంటే ఎక్కువ పెరిగాయని తెలిపినట్లు ఎయిర్లైన్ వెల్లడించింది.
ఈ ఆకస్మిక పెరుగుదల ఇండిగోతో సహా అన్ని విమానయాన సంస్థల ఖర్చుల, నెట్వర్క్లపై గణనీయమైన ప్రభావాన్ని చూపుతుందని పేర్కొంది. ఈ ఇంధన ధరల పెరుగుదల మొత్తం ప్రభావాన్ని భర్తీ చేయడానికి ఛార్జీలకు చాలా గణనీయమైన సర్దుబాటు అవసరం అయినప్పటికీ, వినియోగదారులపై పర్యవసానంగా కలిగే భారాన్ని దృష్టిలో ఉంచుకుని ఇండిగో ఇంధన ఛార్జీగా సాపేక్షంగా తక్కువ మొత్తాన్ని పెంచుతున్నట్లు ఇండిగో చెప్పుకొచ్చింది. మార్చి 14 నుండి ఇండిగో విమానాలలో అన్ని కొత్త బుకింగ్ల కోసం అదనపు ఇంధన ఛార్జీ విధిస్తున్నారు. దేశీయ విమానాలకు రూ.425, భారత ఉపఖండంలో అయితే రూ. 425, మధ్యప్రాచ్యానికి వెళ్లే విమానాలకు రూ.900, ఆగ్నేయాసియా, చైనా వెళ్లే విమానాలకు రూ.1,800, ఆఫ్రికా,పశ్చిమ ఆసియా దేశాల విమానాలకు రూ.1,800, యూరప్ విమానాలకు రూ.2,300 ఇంధన సర్ ఛార్జీ విధిస్తున్నారు.
