International
oi-Jakki Mahesh
Iran Israel War: మధ్యప్రాచ్యంలో ఇరాన్-ఇజ్రాయెల్ దేశాల మధ్య నెలకొన్న ఉద్రిక్తతలు ప్రపంచ దేశాలను ఆందోళనకు గురి చేస్తున్నాయి. ఈ నేపథ్యంలో అమెరికా అధ్యక్షుడు డొనాల్డ్ ట్రంప్ చేసిన కామెంట్స్ అంతర్జాతీయ రాజకీయాల్లో తీవ్ర చర్చకు దారితీశాయి. ఇరాన్, ఇజ్రాయెల్ దేశాల మధ్య జరుగుతున్న ఘర్షణల నేపథ్యంలో ప్రపంచ అగ్రరాజ్యాల కూటమి అయిన జీ7 దేశాల నేతలతో ట్రంప్ ఓ వర్చువల్ సమావేశాన్ని నిర్వహించారు. ఈ సమావేశంలో డొనాల్డ్ ట్రంప్ మాట్లాడుతూ.. ఇరాన్ ప్రస్తుత పరిస్థితి చాలా బలహీనంగా ఉందని, ఆ దేశంలో త్వరలోనే బేషరతుగా లొంగిపోవడానికి సిద్ధమవ్వక తప్పదని వ్యాఖ్యానించారు.
అమెరికా, మిత్రదేశం ఇజ్రాయెల్ సంయుక్తంగా నిర్వహించిన సైనిక కార్యకలాపాలు అత్యంత విజయవంతమయ్యాయని.. దీనివల్ల ఇరాన్ వ్యూహాత్మకంగా, సైనికంగా తీవ్రంగా దెబ్బతిందని ట్రంప్ పేర్కొన్నారు. ఇరాన్ నాయకత్వం ప్రస్తుతం అయోమయంలో ఉందని.. అధికారాన్ని బదిలీ చేసే లేదా లొంగుబాటును ప్రకటించే బాధ్యతాయుతమైన నాయకుడు అక్కడ ఎవరూ లేరని ట్రంప్ విశ్లేషించారు. ఇరాన్ తన పంతాన్ని వీడి, ఎటువంటి షరతులు లేకుండా లొంగిపోతేనే చర్చలకు అవకాశం ఉంటుందని గతంలోనే స్పష్టం చేసిన ట్రంప్.. తన పాత వైఖరినే ఈ సమావేశంలోనూ ప్రదర్శించారు.
ప్రపంచ దేశాల ఆందోళన
డొనాల్డ్ ట్రంప్ చేసిన ఈ కామెంట్లపై జీ7 దేశాల మధ్య భిన్నాభిప్రాయాలు వ్యక్తమవుతున్నాయి. అమెరికా, బ్రిటన్, ఫ్రాన్స్, జర్మనీ, ఇటలీ, కెనడా, జపాన్ నేతలు ఈ యుద్ధం వల్ల కలిగే పరిణామాలపై ఆందోళన వ్యక్తం చేశారు. యుద్ధం మరింత ముదిరితే ప్రపంచ ఆర్థిక వ్యవస్థ కుప్పకూలే ప్రమాదం ఉందని.. ముఖ్యంగా చమురు ధరలు విపరీతంగా పెరిగి సామాన్యుల బడ్జెట్ను దెబ్బతీస్తాయని పలువురు నేతలు హెచ్చరించారు. కొన్ని దేశాలు ట్రంప్ కామెంట్లను యుద్ధాన్ని ముగించే దిశగా ఓ అడుగుగా భావిస్తుంటే.. మరికొన్ని దేశాలు ఇవి ఇరాన్ను మరింత రెచ్చగొట్టి.. యుద్ధాన్ని సుదీర్ఘంగా సాగించేలా చేస్తాయని భయపడుతున్నాయి.
ఇరాన్ స్పందన ఏమిటి?
అమెరకా అధ్యక్షుడు చేసిన ఈ కామెంట్లపై ఇరాన్ నుంచి ఇప్పటివరకు ఎటువంటి అధికారిక స్పందన రాలేదు. అయితే ఈ ప్రాంతంలో ఉద్రిక్తతలు పెరుగుతున్న నేపథ్యంలో ఇరాన్ తన రక్షణ వ్యవస్థలను సిద్ధం చేసుకుంటోందని అంతర్జాతీయ నివేదికలు చెబుతున్నాయి. ఇరాన్లోని ఆజాదీ స్క్వేర్ వద్ద ఇటీవల జరిగిన నిరసనలు, దాడులు అక్కడి అంతర్గత పరిస్థితిని ప్రతిబింబిస్తున్నాయి. మొత్తానికి డొనాల్డ్ ట్రంప్ ప్రకటన ఇరాన్ పై ఒత్తిడిని పెంచేలా ఉన్నప్పటికీ.. క్షేత్రస్థాయిలో పరిస్థితులు ఎలా మారుతాయనేది వేచి చూడాల్సిందే.
