Telangana
oi-Kannaiah
కర్నూలు మాజీ ఎంపీ, వైసీపీ కీలక నాయకురాలు బుట్టా రేణుకకు గట్టి ఎదురుదెబ్బ తగిలింది. వ్యాపార రంగంలోనూ రాణిస్తున్న ఆమె కుటుంబం తీసుకున్న భారీ రుణాలు ఇప్పుడు వారి ఆస్తుల వేలానికి దారితీశాయి. ఎల్ఐసీ హౌసింగ్ ఫైనాన్స్ లిమిటెడ్ (LIC HFL) నుంచి తీసుకున్న రుణాలను సకాలంలో చెల్లించకపోవడంతో,ఆ సంస్థ ఆమెకు చెందిన కోట్లాది రూపాయల విలువైన ఆస్తులను వేలం వేయాలని నిర్ణయించింది. కొంతకాలంగా వాయిదాల చెల్లింపులు నిలిచిపోవడంతో వడ్డీతో కలిపి ఈ బకాయిలు ఏకంగా రూ.782.07 కోట్లకు చేరుకున్నాయి. రుణ పరిష్కారం కోసం గతంలో నోటీసులు జారీ చేసినప్పటికీ, ఇరువర్గాల మధ్య ఎలాంటి ప్రత్యామ్నాయ ఒప్పందాలు కుదరకపోవడంతో ఎల్ఐసీ సంస్థ చివరకు వేలం ప్రక్రియను వేగవంతం చేసింది.
KPHBలో ఆస్తుల వేలం
ఈ వేలం ప్రక్రియలో భాగంగా హైదరాబాద్లోని అత్యంత ఖరీదైన ప్రాంతమైన కేపీహెచ్ (KPHB) కాలనీలోని ఆస్తులను విక్రయానికి ఉంచారు. కేపీహెచ్బీ ఫేజ్-6, సర్వే నంబర్ 1009లో ఉన్న సుమారు 3,833.28 చదరపు గజాల స్థలాన్ని వేలం వేయనున్నట్లు LIC హౌసింగ్ ఫైనాన్స్ బెంగళూరు బ్రాంచి అధికారిక ప్రకటన జారీ చేసింది. అత్యంత కీలకమైన విషయం ఏమిటంటే, ప్రస్తుతం ఈ స్థలంలోనే ప్రముఖ విద్యాసంస్థ ‘మెరిడియన్ స్కూల్’ భవనం కూడా ఉంది.
మెరిడియన్ స్కూలు ఉన్న ఆస్తి కనీస విలువను (Reserve Price) రూ. 65 కోట్లుగా అధికారులు నిర్ణయించారు. ఈ ఏడాది మార్చి 23వ తేదీ వరకు ఆసక్తి కలిగిన అభ్యర్థులు ఈ-బిడ్ ఫారాలను సమర్పించవచ్చని, మార్చి 24న ఈ-వేలం నిర్వహిస్తామని సంస్థ స్పష్టం చేసింది. రాజకీయంగా, వ్యాపారపరంగా పలకుబడి ఉన్న బుట్టా రేణుక కుటుంబానికి ఇది పెద్ద ఆర్థిక సంక్షోభంగా మారుతోంది.
ఆర్థిక సంక్షోభానికి కారణాలేంటి?
వ్యాపార వర్గాల సమాచారం ప్రకారం, అతి తక్కువ కాలంలో భారీగా విస్తరించడం, తీసుకున్న రుణాలకు సరిపడా నగదు ప్రవాహం లేకపోవడమే ఈ పరిస్థితికి ప్రధాన కారణం. గతంలో ఎల్ఐసీ నోటీసులు ఇచ్చినప్పుడు వీరు సుప్రీం కోర్టును కూడా ఆశ్రయించారు, కానీ రుణాల చెల్లింపులో విఫలం కావడంతో ఇప్పుడు ఆస్తుల వేలం అనివార్యమైంది.
బుట్టా రేణుక కుటుంబం కేవలం రాజకీయాల్లోనే కాకుండా, ఉమ్మడి ఆంధ్రప్రదేశ్లో అతిపెద్ద వ్యాపార సామ్రాజ్యాల్లో ఒకటిగా పేరుగాంచిన ‘బుట్టా గ్రూప్’ను నిర్వహిస్తోంది.ఈ గ్రూప్ ప్రధానంగా మూడు రంగాల్లో విస్తరించి ఉంది.విద్యారంగం,ఆటోమొబైల్ రంగం,హాస్పిటాలిటీ రియల్ ఎస్టేట్ రంగాల్లా కార్యకలాపాలు నిర్వహిస్తోంది.బుట్టా గ్రూప్కు అత్యంత గుర్తింపు తెచ్చిన ‘మెరిడియన్ స్కూల్స్’ (Meridian Schools) చైన్. హైదరాబాద్లోని బంజారాహిల్స్, మాదాపూర్, కూకట్పల్లి వంటి కీలక ప్రాంతాల్లో వీరికి బ్రాంచీలు ఉన్నాయి. ప్రస్తుతం వేలానికి వచ్చిన ఆస్తి కూడా ఈ విద్యా సంస్థకు సంబంధించినదే కావడం గమనార్హం.
హోటళ్లు, గెస్ట్ హౌస్లు ,కన్వెన్షన్ సెంటర్ల నిర్వహణలో వీరికి పెద్ద ఎత్తున పెట్టుబడులు ఉన్నాయి. బుట్టా హాస్పిటాలిటీ సంస్థ ద్వారా పలు ఖరీదైన ప్రాజెక్టులను చేపట్టారు. అయితే, గత కొన్నేళ్లుగా రియల్ ఎస్టేట్ మార్కెట్లో ఒడిదుడుకులు మరియు అధిక వడ్డీ రేట్ల కారణంగా ఈ గ్రూప్ ఆర్థిక ఇబ్బందుల్లోకి వెళ్లినట్లు మార్కెట్ నిపుణులు విశ్లేషిస్తున్నారు.
బుట్టా రేణుక రాజకీయ ప్రయాణం
బుట్టా రేణుక రాజకీయ ప్రస్థానాన్ని పరిశీలిస్తే ఆమె ప్రయాణం ఎన్నో ఆసక్తికర మలుపులతో సాగింది. 2014 సార్వత్రిక ఎన్నికల్లో ఆమె తొలిసారిగా వైఎస్సార్ కాంగ్రెస్ పార్టీ తరఫున కర్నూలు ఎంపీగా పోటీ చేసి భారీ మెజారిటీతో విజయం సాధించారు. అయితే, ఆ తర్వాత మారిన రాజకీయ సమీకరణాలతో ఆమె అప్పట్లో తెలుగుదేశం పార్టీకి మద్దతు ప్రకటించారు. మళ్ళీ 2019 ఎన్నికల సమయానికి తిరిగి వైసీపీ గూటికి చేరుకున్నప్పటికీ, జగన్ ఆమెకు టికెట్ నిరాకరించారు. ఆ ఎన్నికల్లో వైసీపీ గెలిచిన తర్వాత ఆమెను పార్టీలో గౌరవప్రదమైన స్థానంలో కొనసాగించి, గత ప్రభుత్వ హయాంలో రాష్ట్ర చేనేత అభివృద్ధి సంస్థ ఛైర్మన్గా నియమించారు.
ప్రస్తుత రాజకీయ పరిస్థితుల్లో బుట్టా రేణుక వైసీపీలోనే కొనసాగుతున్నప్పటికీ, గత కొంతకాలంగా ఆమె క్రియాశీల రాజకీయాలకు దూరంగా ఉంటున్నట్లు సమాచారం. 2024 ఎన్నికల్లోనూ ఆమెకు ప్రత్యక్షంగా పోటీ చేసే అవకాశం రాలేదు. అటు రాజకీయంగా ప్రాభవం తగ్గుతున్న తరుణంలో, ఇటు వ్యాపార పరంగా రూ. 782 కోట్ల బకాయిల అంశం తెరపైకి రావడంతో ఆమె రాజకీయ భవిష్యత్తు ఆర్థిక స్థితిగతులపై కర్నూలు రాజకీయ వర్గాల్లో పెద్ద ఎత్తున చర్చ జరుగుతోంది.
